طــــــــريق الكتابة (1)

كلمة الكتابه مش شئ عادى بالنسبالى كده
ولا معنى حاجه عادية عايش بيها او عشانها وخلاص
ومش حاجه ممكن  تمر مرور الكرام  او يكون الحيز بتاعها مجرد رقم  بعدد السنوات
انما هو طريق اخترته ....
اخترت  امشى فيه رغم انه متعب وممكن لوقت طويل جدا متاخدش حاجه منه
ولا حتى على قد ما كنت بتديه ولكن كفاية متعته وانت بتمشى خطوة خطوة جوا منه
كفايه بس انك بتحس احساس جميل لما تبقى عملت بيه حاجه
ولو  اى شئ صغير فى عين الناس
كل انسان عنده  حاجه فى حياته بتملى عليه الدنيا
بتبقى حاجه احتياطى  كده لاى فرحه ماتضمنش انها تكون موجوده  و بتتحط شئ اساسى فى تركيبته
حاجه ممكن  تنقذه من حاله البؤس الشديد اللى بيكون عايش فيه
و الكتابه بقه كانت هى الشئ دا عندى....

حتى  لما بكون فى حاله التوهان والانكسار بعرف بيها اخرج للدنيا
28 حرف هما  حقيقة كل ما املك فى الدنيا دى
مفيش ممتلكات مكتوبه باسمى ولا عملتها بنفسى غيرها
لا عربيه يقه  ولا شقه ولا اى حاجه غير الحروف اللى بتبقى موجوده هى هى  فى كل كتاب
بس معناها بيختلف من موضع للتانى ولمكان  و موقف معين لغيره من الاحداث

شويه حروف بقدر بفضل الله ان اصيغهم لاى فكره ولاى معنى بشوفه وبفكر فيه
ممكن نستخدمها فى حاجات كويسة آوى  توصل للناس وتريحهم
لما مثلا تكتب عن الناس واللى فيهم ،لما تهتم بعرض مشاكلهم  وكإنك بتقرأ  اللى مكتوب جواهم
عشان  يمكن ماعندهومش الملكه (بفتح اللام)  اللى يعرفوا بيها  يعبروا بطريقتهم عن اللى فيهم
وبفرح جدا لما الاقى حد بيحس براحه واعجاب من اى شئ كتبته حقق اللى كنت بقوله دا

بصراحه... امممم ، انا مش عارف اقول ايه بالظبط  !!
بس زى ما انتم عارفين  كده ان احساس اى انسان لما بيلاقى ناس اعجبت بشئ عمله
فبيحس انه مميز شويه يعنى  ويملاه احساس انه فى طبقه عاليه شويه عنهم
والاحساس دا  زى ما كل الناس عرفاه اسمه "الغرور"
 بيبقى واحده واحده بينفخك تدريجيا ومقابل دا بيروح الشئ المميز اللى فيك
وبعدين ترجع تانى تحس بخيبه الامل انه مبقاش عندك زى الاول..!

بس هو  اللى فيا دلوقت مش غرور ولا حاجه  انما تقدر تقول  زى اللى بيقابل حد ماشفهوش من 20سنه
حد اعلى واغلى من اى بنى آدم عرفه قبل كدا ، فبسبب دا مش لاقى كلام يقوله ساعت ما يشوفه
لان مقابلته واخده كل حرف ممكن يتقال ..
ولانى بكتب عن الكتابه نفسها  اللى هى غنية اصلا عن التعريف ومش محتاجه طبعا انى اعرفكم بيها

انا مش مشهور  ولا حاجه  ولا عملت لنفسى  اعمال افتخر بيها واقدمها للناس بصفتى "كاتب"
لالا لسه بدرى عليا آوى على اللقب دا  وبقعد اقول لنفسى مش عشان  يعنى كتبتلك كلمتين
 او بعض الناس  مثلا عجبها موضوعين  اطلع فيها بقه وابقى زى اللى مفيش زيه ..
دا شعور شايفه هايف !! ، بس بيبقى ضرورى برضه  عشان بعديها لما تتخبط بنقد لازع
او بموقف مش كويس تعدى عليه  تقوم بقه  تعرف مقامك وتكمل بتواضعك اللى المفروض تكمل بيه
ولو ماشفتش انها شئ عادى  وخليت فكره المميزة دى تسيطر  ابقى  مش هاعرف اكتب تانى
اولا .. لان فيه ناس احسن منى بمرااااحل كبيرة اوى
 وثانيا انا مش لوحدى رغم ان بسعى ان اعمل شئ مميز عن بقيت الناس
بس تصدقوا بقه  دا اللى بيحصلى دلوقت،  مش لاقى كلام اكتبه فى موضوع يعتبر ام المواضيع كلها !!

عالم الكتابه دا  اخفاقاته اكتر من انجازاته .. عشان تقعد  تكتب روايه او مسرحية او حتى مقال صغير
ماتعرفش بيحصل ايه فى البنى آدم اللى بيكتب ،بيبقى احيانا شبه اللمونه كده لما تتعصر
انت بتدوق طعمها بس كقارئ ،بس مابتشوفهاش وهى بتتعصر شكلها ايه ..
دا غير  كم الورق اللى بيترمى واللى ممكن تحوشه عشان تبيعه للروبابيكيا !!
او العلامه الكيبورديه "السهم اللى بيمسح الكلام"  اللى بينضغط عليه خمسين مره فى الجملة
وحالات التفكير الطويل لصياغه جملة بسيطه كإنك بتدور على ابره فى كوم قش !
بس فيه لحظات تانيه بتحس  كده ان  الكلمات بتطلع منك بانسيابيه ومن غير اى تكليف
بتبقى صادقة آوى واحساسك بيها طاغى وبيوصل بسرعه  من غير جهد ولا  تفكير
دلوقت  اقدر اقول ان الكتابة تعتبر  افضل حاجه حصلت ليا فى حياتى
 وانى لو فضلت احمد ربنا  مش هاوفيه حمد وشكر لبقيت عمرى عليها

----------------------------
من كتاب " البوابة " ...