الحاله اللى بنكون عليها آخر يوم فى السنه واللى بنشوفها زى الفيلم بيتعرض اللى ليك واللى عليك
كنت اتعلمت من والدى زمان وانا صغير بجانب حصة العلوم ان البطارية ليها شحنات عباره عن
قطبين واحد موجب والتانى سالب مع شويه حاجات مش فاكرها وهيكل من مادة معينة
الاتنين مع بعض بيعملوا كيميا بتخلى لمبه تنور وجهاز يشتغل وخلافه
ولما ينفصل قطب عن التانى ينطفى ويعطل كل شئ
المثل دا معلومه بالفطره معروف فى كل بيت و شارع و محل وشركه
نظرية صغيره من خلالها بتعرف تخرج من حالة الظلام الكامن لحاله الاضاءة والنور
ودا لحد لما يرجع طرف يبعد عن مكانه تقوم ساعتها ترجع كل حاجه ضلمة تانى
ويبقى وجوده مش فارق من عدمه
اهى كده بالظبط حياة الانسان او بمعنى ادق نفسيته
احيانا فيه بنى آدمين متشال عندها الطرف التانى دا
وتبقى شايفه طول الوقت بقيت الناس من جواها من خلال الطرف دا وبس
يعنى مثلا لما يبقى جوانا احزان بنتألم اكتر كمان لما نشوف الناس فرحانه
ومبسوطه والضحكه ماليه عيونها وهى الفرحه مننا مسروقه
الطرف التانى دا مش متوصل كويس محتاج حد يجى يعمله وهى اى حاجه ممكن تعمل سبب
لفرحتنا فى الدنيا
بالاضافه حاجه تانيه كمان ..
فى الوقت دا بنبدأ ندور على الاصول والرأسمال اللى اتكونت بيهم مشروع حياتنا
بتشوف الارباح والخسائر قد ايه وتقارنهم ببعض ونحكم على نفسنا هل نجحنا ولا لا..؟
طبعا مش المفروض ننسى الضرائب اللى بتتاخد علينا طول الوقت
لازم ندفع احنا مش عايشين ببلاش ولو فى الوقت اللى مش بيرجع تانى والجهد اللى بيروح مقابل اللى بنعمله
واللى احيانا بنستخسر نديله لاى حاجه مش شايفنها مهمه ودا راجع لقرار الادارة عندنا فى رؤيتنا ..
هدف المشروع من البدايه فى الدنيا كان ايه بالظبط..؟
غالبا اللى بيحصل دائما ان بنقعد ننتظر الفوائد والعائد اللى بيجى منها وخلاص ...
مع الوقت بننسى ان حياتنا من الاساس عباره عن قروض طويلة الاجل
بنسدد فيها طول محنا عايشين
فيه حاجات كده مش بتندفع هنا ،دى بتفضل مركونه فى الجدول لما يجى وقتها
معادها بيكون فى لحظات آخر العمر لما يجمع كل الحساب ونبقى مش مفتكرين هى طيب يا ترى جت منين .؟!
او مش واخدين بالنا انها هاتعمل تضخم وارتفاع اسعار بالشكل دا
ولان الدنيا مش دائما ثابته على مبدأ واحد ومفيش مشروع بيستمر للابد
وكل ما يتاخد من الرصيد مش بنعرف نعوض تكلفته بعدين
وع الرغم كم كدا نجاح اى مشروع مش شرط عنصر التمويل المادى بيكون الضمان
انما ادراه ناحجة بتعرف توظف امكانياتها كويس وتستفيد
وتكسب خبرات من اللى حواليها ومن المواقف اللى مرت بيها وكمان المعلومات المناسبه
اللى بتركز عليها فى قيام المشروع عن معلومات تانيه كتيرة مالهاش فايده
مش يبقى تكدس بيانات على الفاضى وبس ومفيش تصنيف على اساسه يكمل
حاجه مهمه اوى الشباب مش بيشوفوا ليها اهمية
احتياج خبراء فى كل مجال فى اقتصاد السوق يوضحولنا الامور ماشية ازاى
واللى عادة بنفضل الدخول فى التجارب بنفسنا ومانسمعش لاى نصيحه
مش بنصدق اللى فاتوا وكلامهم ع الدنيا
غالبا المشكله اللى بتواجهنا وبنعانى منها بتبقى محورها كله مش فى العوامل دى كلها بس
انما السوق نفسه اللى مفيش حد فيه رقم واحد عالطول
السوق اللى هو الدنيا اللى عايشين فيها باحتكارات لبعض المنتجين
وبقينا بنشترى احتياجتنا بالسعر المفروض علينا واللى غالبا بيبقى غالى
وبنضطر لكده لان مفيش غير كده ، فيقوم يعيش دائما اللى بيشترى
طب بقه بالنسبة للى مش قادرين..؟؟ ، نعمل ايه لو ماعندناش فى زمن اللى ماعوش مايلزموش!!
نرجع لمثل البطاربة من جديد
السلكين بيوصلوا بترمومتر بيقيس على مدى الايام درجه الفولت "الحاله النفسية"
اللى بتتغير حسب توصيل التيار وشحن البطارية والضغوط اللى عليها
انها ممكن تشغل كذا حاجه مع بعض وتفضل بحالتها
فيه بطاريات بقه عمرها بينتهى بسرعه وتبقى غير صالحة للاستخدام
وعند اول موقف تتباع خرده
وفيه غيرها بتتحمل وبتعيش اكتر وبتعدى الازمات وتعيش
ودا نابع من قدرة الانسان وتحمله والمنشأ اللى اتصنع منه وتربى عليه
اللى لو سليمة وقوية ومغطية الاطارات والجوانب ودائما مليانه مبادئ سليمه
هاتعرف تواجه وتعيش غير طبعا اللى تصنعيها اى كلام او ماكملتش كويس وفيها عيب
وماكلمتش صبر طويل على شحنها من البداية وماكنتش مدّيها حقها من غير تقصير
بس فى نفس الوقت لازم ناخد بالنا ماتدخلش فى توصيل شئ اكبر من قدرتها
لان كده هايحصل قفلة وصدمة وهتحتاج وقت عبال ما تتصلح وترجع تشتغل من جديد
ارتباط البطارية بنفسية الانسان القطب السالب بالحزن والموجب بالفرحه
اللى لازم مايطغاش طرف على التانى ويهمشه ،الاشخاص اللى بتقول للحزن مايجيش فى حياتها
دا تفكير غلط ، لان لازم يكون فيه حزن غصب عنك بس المهم تعرف تتعامل معاه وتوصلّه صح
مش تقوم تحطه فى مكان تانى بعيد وتعتمد على القطب الموجب وبس
واللى هاتكتشف مع الوقت انه مش لوحده اللى حياتك هاتمشى عليه
ونفس الكلام للى غرقان فى الطرف السالب وناسى انه فيه الناحية التانيه طرف موجب
محتاج بس تدور عليه وتمد ايدك وتربطه
هو احيانا مش بتلاقيه بسهولة لانه بيكون اندفن او يمكن مقطوع ومحتاج نعمل واحد زيه جديد
لازم فى الاخر نوصل ان الاتنين يكونوا فى مكانهم وكل طرف فى مكانه الصحيح
ونطلع بمعادله التوازن لحد ما يكتمل نصيبك فى مشروعك ويخلص
ويتعمل تصفيه لممتلكاتك وتبدأ الناس اللى ليها عندك تأخد اصولها
لان عمرك ساعتها بيبقى خلاص ، وكل شركة تانيه بتكمل مع شويه خسائر منك
بس اكيد بيعرفوا يعوضوها فى حياتهم بعد كده ، وكلمة اخيرة ....
خلى بالك كل يوم بيعدى بينكتب فى اليوميات
وكل حدث وشخص مهم فى حياتك بتجمعه حساب استاذ
وبعدين بيتراجعوا كلهم عشان الميزانية يوم الدين
اللى مش هاتدخل جنه او نار غير لما اصولها تبقى على قد الخصوم ...