رسالة عابرة للقارات

صباح الخير ، اكتب اليكِ بعد الفجر ، علي اعتبار ان هنا يبدأ الصباح ، اول أيام عيد الفطر المبارك والذي اعتدت قبل اي صلاة للعيد ان اقول لك " كل عام وانتِ بخير " من قلبي وحتي ان لم تصل يوماً ، فيكفي انها قد وصلت اليكِ فى قلبي الساكنة انتِ فيه
هذا الامر فى كل عيد ، وسط اي ازمات وظروف ومكان وزمان فهي من الثوابت ، كوجودك داخل روحي وتمكنك من ذاكرتي

كنت اتمني ان اصلي العيد يوماً وأتي اليك واضع شيئاً لك كهدية فى حق الملح تقديراً لكِ

كل عام وانت بخير وحفظك الله من كل شر 

حلم صغير

كل يوم وانا بفتح جهاز الشغل بشوف المنظر دا
بسأل : هل ممكن فى يوم اعيش فى مكان زي دا ؟
وهل المكان دا موجود اصلا ؟
جه علي بالي اسرح واتخيل اني قدرت فعلا اكون هناك
لما ببص عليه برتاح مابالك لو عايش فيه
تخيلت ان نفسي اقضي فيه يوم .. يوم واحد بس من غير شغل من غير الناس
من غير اي شئ يربطني بالدنيا
اصحي اعمل مج النسيكافيه واطلع برا البيت دا واشم الهوا
وبعدين اجري شويه حوالين المكان ، غالبا مش هحتاج موسيقي تسليني فى الطريق
المكان لوحده اساسا مسلي
اخلص واروح اخد الدش المتين وبعديها بشويه احضر الفطار
اي فطار ، ان شاء الله خصايه ، فى الجو دا الخصاية هايبقي ليها طعم
وبعدين اخد عدة الصيد واطلع اصطاد وعلي مهلي ، علي مركب ع فلوكة مش مهم اتفرج ع فيلم ، مسرحية ، مسلسل ، ان شاء الله فيديو عن ازاي البس الشرابات اي حاجة واول سمكة تطلع اقوم واخدها سيلفي معايا ، اخلص صيد ع العصر
وارجع احضر للغدا واشوي السمك واغطيه واسيبه واشرب الشاي وانا قاعد برا
مش بفكر مش برتب لشئ ولا فارق معايا بكره هاعمل ايه
بس افضي دماغي ، اتخلص من كل شئ عمل تراكم جوايا
همّ ، شغل ، مواقف محرجة ، مواقف صعبة ، غدر ، مطبات ، غربة ، كل حاجه
انسي الناس ، كل الناس ، كإني اتولدت من جديد وكل اللي فات مجرد حلم
اقيل شويه علي الكرسي برا وبعدين اشوف حد اي حد يجي يتغدي معايا ، وبعدين اقرا فى كتاب وانا مشغل التليفزيون وقافل الصوت
لحد ما اروح فى النوم علي الكرسي الهزاز و .....
" تليفون المكتب يرن "
- خلصت التقرير ؟
- دقيقتين الجهاز يفتح وابعته ان شاء الله..