بغض النظر

بغض النظر عن كل حاجه يعنى ..انت كويس
كلمه بضحك او بلاش اضحك دى ..كلمه باقنع نفسى بيها دائما
انت فل ..مافيكش حاجه والله !
قولها كده عالطول قدام المرايه يجى خمسين سبعين مره
لحد ما عقلك اللاوعى يحسها فعلا وتعيش ع كده
اهو بغض النظر يعنى ان الواقع غير كدا خالص بس ماتخدهاش ع صدرك اوى كده
بص هاقولك..الحكايه ببساطه عنوانين
مش بتعرف تعرف الناس باللى جواك حقيقى
ومش بتعرف تتكيف ع الواقع المحيط فى حل لمشاكله
يعنى عايش الدور بمعنى اصح !
طب والناس ذنبها ايه ؟! ، يمكن عشان صادفوا فى حياتهم شخص مثلى
ودا ع اساس طبعاً انى منفرد عن العالم ، وان اللى عندى مش عند حد
يا سلاااام ع السذاجة وضيق الافق اللى عندك
الله بالمناسبة يعنى ايه ضيق افق يعنى ؟! ، ماتخدش فى بالك ،هى جات ع دى
بالمناسبة برضه انا مش عارف اكتب ايه
يعنى بملى فراغ تدوينه يوم جى فيه من تعب رهيب
رجلى مش شايلانى اساساً ، لا صليت ولا تراويح ولا تهجد
عباره عن نوم ثم نوم وبعدين فوقان وتحس ان متاهتك رجهت من تانى
ومش عارف فين السبب بالظبط بس وبتحاول تدورلك ع حل
او ع شئ ينهى المتاهه بسلام المرة دى
اه ع فكره ،المتاهه من باب وضح الغموض هى عباره عن الاتى ..
مثلا تقوم من النوم بنفس احساسك فى لحظة معينه الزمن بالنسبالك وقف عندها
وتبدأ بالتدريج كإنك اول مره بتعيشها وتنسى كل الارتباطات اللى حصلت فى النص
اهو بتحاول تفتكر شئ يكون ليك ذريعه تساعدك انك تبقى كويس
وانك عديت المرحلة دى خلاص ، وماتسألش يعنى ايه ذريعه !!
احساس الواقف فى محطه ماهوش عارف مستنى مين او مستنيه ليه اصلا
انت بتكتشف انك فى مكان مش مكانك ولا انت عارف جاى ليه
بس مع الوقت بتتكيف ع المكان ويتحاول بقه تبنى صداقات تغنيك عن الوحدة
او شعور بمعانى مفتقدها ونفسها ترجعلك
او تحس انك عايش فى عالم بتاعك انت فيه شئ مهم
يعنى زى تعويض كده عن الواقع اللى مش عارف بدايته من نهايته
ماانت ناسى بقه ؟! وبعدين مش معاك اجنده او مايكرو فيلم يقولك انت كنت رايح فين
بتفوق كده وخلاص ومساحة من الوقت طويله جدا عبال ما تتكيف وترجع لحالتك الطبيعية
اللى هى اصلا مش طبيعية ..حد فاهم حاجه؟!
المهم انى وصلت لقدر لا بأس به من الكلمات اللى اقدر اقول ان مليت بيها تدوينه النهارضه
وماتحاولش تفهم حاجه..لانك مش هاتفهم اللى بقوله زى منا عايز
يعنى اكيد ممكن تشوفها "ترهات" "بحوّر عليكم مثلا " "اى هاتش والسلام"
ومصطلح هاتش بصراحه يعبر عن اى شئ لا علاقة بيه لا موضوع بالمناسبه
عشان محدش يقولى يعنى ايه هاتش دى كمان ! ، اهو دا اللى ناقص
بص يا عزيزى القارئ ، ياللى حظك السئ خلاك تيجى لهنا وتقرأ التدوينه دى
باعتذرلك بالنيابه عن المدونة وبالاصاله عن نفسى العبد الله الفقير لغوياً ومعنوياً 
واى حاجه تانيه بتنتهى بـ.." إياً " !
خدلك دش او روح اتسحر  ولو الفجر  اذن تبقى تنام او  تستنى بقه للفطار
يالا تخدها من قاصرها وماتتدخلش المدونه تانى .. ادينى حذرت اهو
مشيتوا.. مشيتوا خلاص ..زى الفل