القصه وما فيها ...

 

فى يوم 25 يناير قدوة باللى حصل  فى تونس عملنا ثوره ، فى ذكرى كل سنه بنثور ع النظام الحاكم
لان تقريبا بيطلع فشنك .. اى كلام فى الاخر زى المجلس العسكرى اللى بيقول انه حمى الثوره
فمسك حكم البلد سنة او قرابة سنتين تقريبا او سنه ونص وحصل فى البلد بلاوى كتيره
خلتنا نؤمن ان المجلس ماهو الا تكمله للنظام اللى اقمنا عليه ثورة
 حصل انتخابات رئاسية وبرلمانيه ودستور البرلمان فاز بالاخوان الاغلبيه وكذلك الرئاسيه

واتعمل دستور فى عهد الاخوان اتقال النتيجه النهائيه عليه ... نعم ودا عشان الاستقرار
سبحان الله نفس السبب اللى اتعمل بيه دستور دلوقت ، سيبك يا افندى من الاخطاء
والانتقادات الموجوده ، اصلا محدش قرا ، واللى قرا مافهمش .. من الاخر مانضحكش ع بعض
لحد كده تمام .....؟

بعد سنة بالظبط حصلت حاجه البعض بيقول عليها ثوره والبعض الاخر انقلاب
خرج وزير الدفاع بتاعنا وشال الحكومة والنظام ، وقام بتعيين رئيس مؤقت وحط الاخوان فى السجون

قبل منها كان حصل تلات حاجات
الاعلام سخن الشارع المصرى ضد الاخوان فلما حصل اللى حصل معظم الناس كانت ساكته
واللى اعترض راح لمنطقه اسمها رابعه العدوية واللى حصل بعديها ما يعرف
بمجزرة فض اعتصام رابعه ، عشان كده الاخوان ليهم شعار دلوقت بيرفعوا اسمه " رابعه"
وصار كل اللى يشير اليه مجرم قضائياً ؟، تصور!! ، لو بس رفع اشاره بايده معناها كده

تانى حاجه .. غباء الاخوان ساعد على سكوت الشعب لان الاخوان سابوا الثوار فى مواقف
قبل كده واثبتوا لقطاع كبير انه فقط بتوع سلطه
وف عهد الاخوان كان بيحصل قضايا كتيره معرفوش يحلوها ، كانت ازمات مفتعله تقريباً
عشان يثبت للعالم انه نظام فاشل
بس هو الحقيقه من غير حتى الازمات دى كان هو برضه نظام فاشل من وجهه نظرى

الحاجه التالته .. الاخوان اتوضعوا فى صورة الارهاب
يعنى اصبح شئ منطقى انك تصدق ان مجرد انك اخوانى تبقى فى نظر الناس ارهابى
وان اى حاجه بتحصل فى البلد بتحصل من الاخوان اصبح هناك اخوان فوبيا
دا بسبب الاعلام الموجهه من النظام الحالى عشان يزرعوا ف الشعب الخوف من الاخوان
وميبقاش فيه ملجأ الا لشئ واحد وهو رجوع حكم العسكر من جديد
واصبح وزير الدفاع اللى عمل الانقلاب او الثورة زى ما بيتقال رمز جديد رافعين صورته
شعبنا دا بيحب يصنع الفرعون ، سواء خوف او جهل او غباء
دلوقت اصدر قرار من شويه من رئيس الجمهورية اللى معينه وزير الدفاع
ان وزير الدفاع يكون برتبه مشير والمجلس العسكرى اعطى له تفويض للترشيح للرئاسة
 يالا يا شعب البس بقه عشان خارجين !!
حاله الاحباط فى الجيل دا بقت شئ طبيعى ، طبيعى جداً انك تبقى متشاءم  الواقع محبط من البلد
 ومن اللى عايشين فيها ومن اللى السلطه اللى دايره فى مكان دى ..

وكما قال صديقى ... ايـــــــــــام سودة !!