ادخل برجلك اليمين

اهلا 2014 .. ازيك ، عامل ايه ، منور والله ، يارب تكون سعيد انك جيت فى ساعاتك الاولى فى الحياة
ناس كتير كانت بنتظرك بس مالحقوش ، اللى عايشين دلوقت هما المحظوظين شويه
بخصوص اخوك اللى راح ياريت ماتتكلمش عنه ولا تسأله عننا واحنا كمان مش هنفكر فى اللى جرى فيه
2013 كان اخ غالى علينا كلنا ، بس دا عمر وانقضى ، واهو راح لحاله ، والحى ابقى من الميت

حاول ان تكون متفاءل وحياة ابوك ، السنة اللى عدت دى جابتلنا الضغط والسكر بكافة انواعه
فى لحظات حلوة كانت فيه ، بس اللحظات الصعبة كانت اكتر ، مخابيش عليك ، الناس كلها كانت مضايقه
ونفسها تخلص السنة اللى فاتت دى ع خير ، طبعاً وانت جاى اكيد سمعت عن الايام الاخيرة
معلش ، اديك اخدت فكرة ، وبالشكل دا هاتدينا العذر اننا نتفاءل شويتين بيك

والنبى ياشيخ ، انا مش طالب منك انى اسافر اليابان الشقيق ولا ان اكمل عمرى هناك واحس بقيمة الانسان
لا هو الحكاية كلها ان نفسنا نشم نفسنا حبتين ، احنا متعودين ع البهدلة بقالنا تلات سنين
وخلاص كده كفاااية اوى ، يعنى نعمل ستوب كده ونبدأ من اول وجديد
الفترة اللى هاتقعدها هنا فى الدنيا اللى هى 365 او 366 تقريباً اعتقد ان الاحداث فيها ممكن تبقى اكبر شأناً
من اللى فات ، اسمحلى بقه اكلمك عن بلدى العزيزة مصر واللى ممكن يحصل فيها ان شاء الله

بص يا اخ ، بيقولوا هايبقى فيه استفتاء ع الدستور  ، كبير فرع العيلة عندكم اخوك 2011 الله يرحمة

 كان فيه استفتاء برده بس ماكنش ع الدستور  ، كنا لسه خارجين جديد من ظروف غيرت تقريبا كل حاجه فى البلد
واللى تقريبا على حظك اللى اتغير رجع زى الاول تانى ويمكن بشكل اسؤأ ، بس ماتشتغلش بالك انت
ونفس الكلام على 2013 برده كان فيه استفتاء هو نفسه اللى هايتعمل معاك بعد 15 يوم من دلوقت
مش عايزك تكتئب ها..؟ مش معنى يعنى ان اللى حصل دا ممكن يحصل تانى
لا اصل اقولك الناس زهقت خلاص ، يعنى المعلم 2015 ماعتقدش ان الناس هاتتقبل فيه فكره دستور تانى
ولا نظام جديد يتعمل فى نص السنه يقلب الدنيا وماتقعدش تانى
احنا املنا فى ربنا ثم فيك ، نستقر شويه ونهدا كده ، رغم ان ماظنش يعنى لان كان غيرك اشطر
بس ادينا بنقول يارب

هايحصل برده ان شاء الله زى ما بيقولوا انتخابات رئاسية ومجلس شعب والذى منه
طبعا لو بتقرأ فى شجرة العايله هتعرف ان حصل برده فى 2012 الله يرحمة نفس الموال
مش بقولك كده عشان تقولى انك هاتبقى نسخة مكررة منهم ، لالا ان شاء الله خير يعنى ، الموضوع بس
انى بوعيك شوية عشان تاخد بالك من اللى حصل وتنتبه كده فى اى خطوة بتعملها
الناس أملها فيك كبير ، عندها انشراح كده لرقم 14 بغض النظر ان جزء من اسمك فيه رقم 4 ودا طبعاً
انصحك تلبس جاكت او كاب عليه قدام اى عسكرى او اى حد عموماً عشان مايتعملش معاك السليمة

انا عارف ان الحمل عليك كبير ، جاى والدنيا كلها طالبه منك تبقى كويس فى وضع لا يبشر ابداً بالخير
بس صدقنى هنحاول ولو على المستوى الشخصى اننا نعمل اللى مقدرناش نعمله مع اخوك الكبير
المعلم 2013 ربنا يرحمة ويحسن اليه ، ماتزعلش من الناس وطريقة وداعها ليه ، انت عارف الظروف بقه
وتأكد انك ان شاء الله هاتبقى من احلى السنين اللى هانقضيها فى حياتنا ، بإذن الله يعنى
بما ان بالنسبالى هاتبقى سنة التخرج وبداية الحياة الواقعية ، فانا سعيد بصراحة بمعرفتى بيك
عايز اقولك برده اننا جاهز ليك بشكل احسن من اللى فات ، اصل حصل حاجات كتير اوى صعب احكيهالك فى كلمتين
بس تأكد ان كل اللى اتعلمته هاطبقه معاك ، ونطلع مع بعض بتائج كويسه
وعلى فكره انا مش زعلان من اللى حصل ، انا راضى بكل شئ ، زعلت وانجرحت واتبهدلت نفسياً شوية
بس كل دا ليه ميزه بعدين ، وزى ما بيقولوا مفيش حلاوة من غير نار
ان شاء الله بقه مرحلة النار تكون عدت وتبقى انت الحلاوة يا حلاااااوه ، والنبى انت طعم

مش عايز اقولك بقه  البيت بيتك ، خد راحتك على الاخر ، شويه وهاتتعود على الاوضاع وهاتبقى زى الفل
اول ما يعدى يناير على خير اعرف ان شاء الله بقيت السنة هاتبقى تمام ، وخد بالك من شويه تواريخ كده
لزوم الاحتياط ، يوم 25 يناير و28 يناير و11 فبراير ، غير ايام الجمعة ، و30 يونيو
ويمكن شويه تواريخ كمان لذكرى حوادث او مصادمات مش فاكرها الحقيقة
هاتمسع حاجات كتير يمكن ماتعجبكش ، طنش ولا يكون فى بالك خاااالص ، خليك رويح يا ابا رشدى
لان مافيش فى البلد دى اكتر من الكلام ، صدقنى ، خلى اللى يقول يقول
وخليك انت مركز فى شغلك واستقرارك وان تبقى ذكرى جميلة لينا وللى هايعدى منك وللاجيال القادمة فيما بعد
واحب ارحب بيك من جديد و اهلاً وسهلاً بيك مرة تانية يا 2014