دردشة اخر الليل (يعنى ايه انطوائى)

السلام عليكم ، حبيت اتكلم بالعامية شويه ، يمكن زهق من الفصحى ، تغير ربما ، ممكن اللى اقوله تفهم حاجه منه
وممكـــــــــــن ماتفهمش ...

بص ياسيدى/ ستى ، المفروض انى لسه شباب ، لا مش كده ، انا فى اوله ، زى ما بيقولوا بداية المشوار
وبداية اى مشوار فى الدنيا بيكون خليط بين الحماس – الخوف – التوتر – القلق- النظرة الضيقة لاى مشكلة
ممكن تقابلها فى الوش ..
زمان ، وانا فى ثانوى ، من قيمه 7 او 8 سنين كده ، كان ليا ساعتها واحد قريبى فى نفس عمرى ورايحين درس عربى
قالى انت بتقول كلام كبير ، اكبر من سنك ، هو طبيعى فى مرحلة زى المراهقة زى اى واحد فى الدنيا اهتماماتى مثلا
حوالين الكورة – البنات – الفسح – الانتخة – قعدة السايبر -  اى حاجه تبسط وخلاص
انا بقه لا كان ليا فى الكورة ولا بعرف اصاحب بنات ولا كنت بحب اتفسح او بمعنى اصح شويه "مابطلعش رحلات جماعية"
 الموضوع دا لسه لحد دلوقت ، والسبب وقتها واللى هو مازال قائم الى الان انى ....... انطوائى

بس هو يعنى ايه انطوائى ؟ .. من خلال خبرتى الشخصيه هاقولك ..
واحد ربنا خلقه عشان تبقى الناس والعلاقات اخر شئ ممكن يهتم بيه ، هو طبيعته كده ، بس مقابل دا
عنده اماكن محفوظة لعدد من الناس محدودين جداً ، هاتحس بعمق كبيـــــر فيها ، تقدر تقول الخلاصه
لو حب انسان بيتحول الانسان دا لشئ زى الملاك فى نظره ، شئ مقدس عن الناس ، بيبقى شئ محفور جواه
بيندمج فى تكوينه ، بيدخل عالمه الداخلى السرى اللى من برا زى الخندق ومن جوا براح واسع وطويل

دا كان نفسياً .. على مستوى الوظيفة مثلا فيه انواع كتيرة بس من خلال خبرتى برده اقدر اقولك
ان الانطوائى لما بيحب المجال اللى هو فيه ، مع الوقت ممكن تلاقى عقله عباره عن كمبيوتر متخزن فيه ادق التفاصيل
الاشياء اللى بعض الناس ماتهمتمش فيها ، ودا لانه سايب كل الحاجات اللى ممكن تشغل البشر فى حياتهم وشايفها
نوع من الترفيه ، فبيركز على شئ شايفه هدف سامى ، رقم قياسى ، شئ يعبر عنه تعويضاً عن عدم معرفته بوسائل
التعبير عن النفس اجتماعياً ، وعلى سبيل الفشخره هتلاقى الكثير من العلماء والادباء والعباقرة اصلا انطوائيين

انما بقه على مستوى الانفعالى ، فهو الاغلب بيكون خبير فى كيفية كتمان اللى جواه بشدة وبحرفية تامة
ساعت ما يطلع اللى جواه اعرف تلقائياً انه وصل لمرحلة لو ماكنش اتكلم كان هايحصل زى اللى حصل للقنبلة الذرية
لما وقعت على هيروشيما ونجازاكى بالظبط ، يهمه جداً تقديره لذاته ، ومايكنش ضعيف قدام الخصم من جواه
تفكيره عميق ، احياناً بيدخل فى مود الادمان لحاجات كتير ، بيعشق الروتينيات اللى بتفكره دايما بلحظة زمنية معينة
عملت اثر جميل جواه ، وسريع جداً فى الاحساس بأى تغير حواليه ، ممكن تلاقى عنده زى ما بيقولوا " الحاسة السابعة"
هى مش حاسه اضافيه ولا حاجه ، بس هو عنده خبره فى الاحساس متراكمه عنده من ساعت ماكان طفل بيحب يقعد لوحده
وسايب زمايله يلعبوا ويهزروا ولما يدوروا عليه يهرب منهم ..... زى ما كنت بعمل


على المستوى الشكلى ، للاسف مش بيهتم بنفسه ، يعنى ممكن تلاقيه لا بيحط "جل" ولا كريم للشعر
ولا تلاقيه بيشترى ملابس اسعارها عالية وماركات عالمية ، ولا شرط الجزمة تبقى متلمعه كل يوم
ولا الجاكت متعلق بما يرضى الله ، ولا القميص مكوى اساساً ، انما عادى اللى يتلبس يبقى زى الفل
طب دا ليه ..؟ ، لان اصلا هو مش هدفه الحصول على اعجاب الناس ودا _لا اراديا_ ع فكرة
مش تنطيط ولا فزلكة منه على خلق الله ، هو بيهتم جدا بالجوهر اكتر بمراااحل من المظهر
عشان كده مش معروف اجتماعياً ، ولو قابلته فى الشارع يمكن استحاله شكله يشجعك انك تتعرف عليه
بس لو عرفته من جواه الاول هايفرق معاك كتير .... زى العبد لله كده !