على شاطئ العاطفة

مش كل عاطفه بنحسها ناحيه حد هى بالضرورة بتكون صح
العاطفه مش خارح القانون ،قانون الصواب والخطأ
رغم انها من النادر انها تخضع للتنصيف دا بس واجب نحطها فى الميزان

فيه عاطفه بتخليك تدّى غيرك من غير  تاخد شئ  وتشوفه شئ كبير ويقعد يكبر جواك
بس من غير مقابل منه او تبادل لانه بيبقى من وجهه نظرك انت بس يستاهل
ساعتها بتحس انك بتتآكل لحد ما هيجى يوم
وملاقتيش نفسك ويكون الشخص دا ضخم جواك
 مش قادر تتعامل معاه او تتصرف فيه لان شئ مش عادى جواك
بتحس انه ملهوش بديل ونفس الوقت مفيش اى احساس مقابل ليك
هنا العاطفة بتفسدك
 وبتكون اكبر غلطة بتعملها كل ثانيه بتعدى لو استمر الشخص دا عايش فيك
انما لازم تشوف نفسك
 ودا مش معناه انك انانى بس انما بتعدل شويه زى ما قولت من الميزان

فيه عاطفه صالحة ودى إيّاك تفرط فيها او تخبيها
عاطفة منك للشخص ما  واللى هو كمان انت جواه
تكبر العاطفه بينكم وتصنع بوجودها حائط صد لاى عقبة
 ولأى مشكله ممكن تقابلكم فى يوم من الايام
التفكير اللى الناس بتقع فيه ناحية العاطفة
التفكير انها كلها عمرها ما تكون غير للخير ،دا صحيح
بس  مش لاى مكان انما فى المكان المناسب  وبس ...
ماتحطش العسل جوا قهوه وتشرب وتقول طعمه حلو !,بتضحك على نفسك
فيه حاجه دائما قبل الحب  فيه خانة لازم تتملى  واوراق لازم نقراها
 ومكان لازم نزوره قبل ما نقرر تعطى عاطفتك لانسان إفتكر انه انسان
لو مش زى اللى جواك بالظبط يبقى كده بتميل الترابيزة
 وكل شويه يقع منها حاجات لحد ما فالآخر وفى النهاية هتلاقيها مقلوبه فوق دماغك !

______
جزء من حلقة (على شاطئ العاطفة)
من كتابى الاول " البوابة " ...