عفارم عليك

- هو الفيس دا اخرك فى استخدامه ايه ؟؟
- ارفع صورة ، فيديو ، تكتب معلومه ، تشيّر حاجه ، ابداء اعجاب
تتكلم مع حد كتابياً مع ايموشن يوصف حالتك اللى انت فيها

- بس ؟! ، يعنى مش تقدر تمشى على البحر ، تشم شويه هوا ، تتكلم مع حد بصوتك
وبملامحك ، وب احساسك  ، تشوف وجوه الناس ، اماكن ، الحياة بشكل عام

- لا طبعاً ، احنا فى فضاء الكترونى  فى اول وف الاخر
- طب اللى نفسه يعيش كل دا ومش لاقى
انت عارف ؟ حياتى كلها هنا ، لو قفلت الاكونت دا هاحس بعدها بدقيقة انى فى صحراء جراء
بلا زرع وبلا ماء ! ، مش هلاقى حد معايا

- وانت ايه وصلك لكدا ؟!
- نفس السبب  اللى خلى حياتى معظمها هنا
- امممم ، معلش

- ياريت اقدر اقول لنفسى كده وتقبل اعتذارى ، فضلت حابسها لفتره طويلة اوى
- معلش بكره تتعدل
- بكره دا مش جى طول ما روحى متعلقه هنا
- يعنى ايه
- يعنى ببساطه لازم تختار ، او تعيد الاختيار 
- فى ايه ؟
- يا تعيش هنا وتكمل الجفاف اللى انت فيه ، يا تفكر فى المحيط حوالين منك
- ودا ازاى ؟؟
- مثلا .. لما الحكومة تفشل فى اداره البلد بيعمل ايه مجلش الشعب فيها
- ههههههههه بيسحب الثقه
- تماااااااااام .. اديك قولتها

- مش فاهم
- ماتعتمدش على حد ماشفتهوش بعينك ، ماتعملتش معاه بنفسك
يبقوا اضافه لحياتك مش اولوية

- امممممممم

- الفيس بوك دا والانترنت عموماً بيكون جميل جداً فى حالة واحده
- ايه هى ؟
- لما مايكونش اعتمادك عليه اعتماد اساسى فى حياتك
- عفارم عليك .. انت كده صح