كلمة اضافية

دايما فى كل زمن الناس بتأخد من اللى قبل منها شكل وطرق حياتهم ومعتقداتهم
دا اللى حصل فى الاجيال السابقة ، حتى فى نظام العبودية والرق ، كان بالوراثة
نادر جداً لما تلاقى واحد وقف وقالك .. لا انا مختلف .. انا حر !
ودايما زى ماهو معروف ان الكلمه دى بتقابل دائما قمع عبر مختلف العصور
يعنى بتحارب وبتلاقى نفسك مزنوق ومزروع وسط تلاميت حرب عشان تنال اللى المفروض
انها ابسط حقوقك .. وهى الحرية ، مش حرية الرق والعبودية انما حريات تانية
بداية من حرية التحكم فى مصير مشوارك الدنيوى لحد المعتقدات ومشوارك الاخروى

هادخل فى الموضوع عالطول .. احنا الجيل دا قال بأعلى صوته انه مختلف
وعايز ينال حريته ، وطول الوقت كان مستعجب ومستغرب من سؤال نفسه يلاقيله اجابة
من الجيل اللى سبقه اللى هما العواجيز حاليا ...
هو ليه كنتم ساكتين على كل حاجه طول حياتكم ؟؟!!!
يمكن تكون الاجابة بإختصار شديد هو زى ما قال صديقى  اثناء مناقشته لموضوع
حول جيل العواجيز وجيل الشباب ان المشكله تكمن فى القمع وحاجه كمان وهى النضج !
الكلام مقنع ويمكن دا يكون السبب الحقيقى
فعلا هما ماكنش عندهم وعى او محاطين بغلاف يسمحلهم بالنضج ، مش زى دلوقت

انت عارف الجيل دا اصبح بيعرف كل شئ بمنتهى السهولة لدرجة وصل بيها
ان مبقاش عايز يعرف اى شئ عن اى شئ ، صار اكبر طموحاته فى اشياء بسيطة جداً
لا تحتاج لهذا الكم المهول من ثورة تكنولوجيا المعلومات والاتصالات .. بس يا ترى ليه ؟!
 لسبب بسيط وهـــــــــو اليأس ، اليأس من تغير الواقع  
 طبعاً فيه غيرهم بيستغل دا فى شئ مفيد وصالح ويقدر يبنى بيه مستقبله ويفيد بيه غيره
الفكره من كل دا ان اصبح معرفة خيط النور من خيط الظلام واضح
انت اتعرفت على مجتمعات تانيه لقيت فيها اللى مش لاقيه .. بقيت ببساطة بتحلم تبقى زيهم
ومفيش غير طريقة واحده ... ان اعترض واقول لا ، لعلها البداية

دا حصل فعلاً ، وبغض النظر عن الاسلوب اللى اتبعه الشباب فيما بعد ولكن كانت الفطرة
لحد ما سليمة .. انا ليه اسكت على حاكم يظلمنى ويسرقنى عينى عينك ويتحكم فيا ؟
ليه اسكت على جيل كل همهم يأمرونا نمشى على خطاهم وكإننا مالناش عقل نفكر بيه ؟
ليه مش قادرين يفهموا ان الزمن دا غير زمنهم وبالتالى افكارنا غير افكارهم وحياتنا غير حياتهم ؟
ليه دائما احنا غلط وبايظين ومش فاهمين حاجه ، انتوا ليه عايزين تعيشوا زمنكم وزمن غيركم ؟!!
ليه دايما انتم على صح واحنا على غلط ، هى الحكاية بالسن  ولا بالعقل والتفكير ؟
ليه مش بناخد حقنا وفرصتنا كاملة عشان نعمل ونوريكم اننا نقدر نعمل حاجات مش حاجه واحدة ؟!
كل حاجه فى البلد انتم اللى ماسكينها ؟ حد يقولى ازاى واحد كبير فى السن هايبقى عنده حماس
وعقلة هايخليه يبتكر ويغير الروتين الغبى اللى مدفونين ومتحنطين فيه دا ؟!
حضرتك عايش طول حياتك كدا وجاى تكمل بقيته علينا .. ؟ وكمان مش راضى ولا قابل تسمعنا ؟!


المشكلة اننا بنسبة كبيرة لا نملك غير الصوت
 واللى للاسف _ بدون احباط_ بدأ فى الزوال والاختفاء
حللى بقه على جيل بعدينا يسألنا نفس السؤال بس بصيغة افضل ..؟
انتم ليه استسلمتوا لليأس ..؟ كنتم فين ساعة ما حصل كذا وكذا ... هانرد نقولهم ايـــــــــه ؟
ماهو لازم تعرف انك زى ما نظرتك دلوقت لجيل العواجيز فيها شماته ومليئة بالتهم
ان الجيل القادم هايبص يشوف حضرتك عملت ايه برده ..

الصراع دايما ازلى بين مختلف الاجيال ، زى ما العواجيز حاليا بيتصعنوا مبررات لحمايتهم
 من اتهامات الواقع ، حضرتك برده هاتعمل نفس الكلام ، ونيجى ندخل فى دوامه ودايرة
تلف بينا ومش هانوصل لحد  ، اقولك المشكلة فعلاً ايه ..؟ بس من غير زعل
لا الجيل اللى فات اتعلم يربى ولا الجيل دا قرر يتعلم  ، كله بيبحث عن اقصر الطرق
كله بيبص تحت رجلية بس ، غير مدرك ان الاجيال المفروض بتسلم كل مفاتيح الحزن
للجيل اللى بعده عشان يكملوا المسيرة ، والجيل السابق يبقى فاهم دا والجيل الحالى مستوعبه
مش لسه فيه صراع على مين الافضل وصح ولا غلط
احب اقولك ان فيه مجتمعات السؤال دا خلصت اجابته من تلات قرون فاتوا !!