الفرق بين .....

الفرق بين الجيل دا وجيل العواجيز  سياسياً واجتماعياً وثقافياً وفكرياً
عندى كلام كتير بس دا اللى قدرت اقوله بإختصار شديد جدا ً
مبدئياً .. لفظ العواجيز دا مش شتيمة _لسمح الله _ ، كلنا هانبقى فى المرحلة دى وقت ما
حالياً وعلى مدار 60 سنه جيل العواجيز دا هو تقريبا المحرك لكل شئ
بداية من رجال الاعمال والوزراء والمسؤلين لحد والدى ووالدك ..
سمة الفتره العمرية لما كانوا شباب ، كانت لا تخلى من وجود الاصالة فى كل شئ
من الاغانى لحد ابسط الاشياء ، كانوا واقعين اكثر مننا بمراحل
كان عندهم ذوق وكفاح ومروا بأيام صعبة من نكسه وغلاء وبلاوى !
بس قدروا يكملوا ويعيشوا ، كان عندهم حب وارتباط وعلاقات وحاجات
 من اللى بتعملها دلوقت عيال لسه ماطلعش من البيضه ، بس الفرق ان نسبه كبيرة
منهم كانت بجد ، دلوقت نسبة كبيرة جدا تسلية
الجيل السابق دايما بيحسسك انهم خبرة فى كل شئ ، وتبع نظرية على قد لحافك مد رجليك
طبعا فيه منهم اللى كان طموحه عالى ، بس دول كانوا بيمتازوا بالمخاطرة
المهم انهم كان فيه سمة مشتركه بينهم طول الـ30 سنه اللى فاتت ..... السكوت !

 احنا بقه ، الجيل البايظ ، اللى مايعرفش اى حاجه فى اى حاجه .جيل الجل والاكس ال
اللى ماعندوش خبره فى الحياة ولا قادر ينجح فى اى حاجه ، واللى اصبحت
حاجات كتير فى حياته فالصو..  بداية من الاغانى المهجنة بالتلوث السمعى
لحد اهتماماتة السخيفة والتافهه ..بس فجأة وبدون سابق مواعيد حصلت انتفاضة .. ثورة
 مش ثورة بس على نظام سياسى ، انما تشعر بإنها ثورة على كل شئ ، على دولة العواجيز !!

الفرق كبير ، حتى فى التعامل ، نسبة بسيطة جداً اللى ممكن تلاقيها بينها تفاهم مع الشباب
وبيطبقوا نظرية " ان كبر ابنك خاويه " .. الباقى بيتعامل معاهم معاملة القاضى والمتهم !!
ليه ؟؟ لانهم حاسين ان الزمن ظلمهم ، وان الزمن دا اكثر رفاهيه منهم
دلوقت تقدر تتعلم اى شئ ، زمان كان لو اتعلمت حاجه تبقى رزقك وااسع وحظك بومب
دلوقت ممكن تعرف اى شئ بسهوله ، ربنا يخليلنا عم جوجل ، زمان لا كان فيه جوجل ولا بتنجان
زمان عشان تتعرف ع حد بعيد عنك بشارعين تبقى اجتماعى فشخ ، دلوقت فى بلد وقارة تانيه خالص
عمرك ماسمعت عنها ولا كنت هاتسمع !!
يبقى حقة يشوف كل الامكانيات دى ويشوفك هايف وسخيف ، ومايحاكماكش ؟!!

تقوم لما تعمل ثورة يسكت ؟؟ لا ابداً مايصحش !
هما خلاص عرفوا الفوله ، وقدروا يوصلوا للزتونه بدرى ، ماينفعش غير حاكم عسكرى
اصلهم طول عمرهم كده واجدادهم ، تيجى انت يا مفعوص افندى تقولى ماينفعش
انت مين انت ؟؟! ، دا انت حتى مش ثابت ع موقف ولا قرار
والحقيقة عندهم حق ، الناس الكبار دول مش فارقة معاهم ثورة اللى كان فارق معاهم حاجه تانيه
خااالص وهى " الاستقرار" ، اصلك ماجربتش تبقى مسؤول عن اسرة وكبرت ومحتاج امان
لاخر فتره فى عمرك وعايز تقضيها فى امن وتأمن اسرتك 
وجع الدماغ ويسقط النظام والهرى دا لييييييييييه؟! ، مش فاضيين للكلام دا
هو عارف ان النهاية هاترجع كل شئ زى ما كانت ، لانه عارف اساس المجتمع
وعارف اساس السياسة عارف ان سكوته كان اكبر منه
 وخضع لكده الا القليل منهم .. لان ما باليد حيلة !!


احنا بقه الجيل اللى لسه طالع من البيضة ، عايز كل شئ يتغير بمجرد الرفض والثورة
يا حبيبى افهم .. انت لسه صغير ، كان لازم تسمع للكبير وتسد الثغرات ، كان لازم تكسبهم فى صفك
مش تعاديهم ، انا عارف انك مشحون منهم ، من اول كلمه " قوووم ذاااكر"
لحد تشجيعهم لكيانات سياسية فاسدة ، صدقنى هما عارفين دا ضمنياً بس هما بيبصوا فى حدود المتاح
وانت بتبص من غير حدود اصلا !!


يمكن اكون متحامل بعض الشئ علينا ، رغم انى من الجيل دا _الشباب يعنى _
بس عايز اقول كلمة اخيرة ، احنا فينا حاجات كتير اوى كويسة مشكلتنا الوحيدة فى حاجتين
ماعندناش وحدة وملناش قائد ودا ناتج عن اننا لسه بدرى علينا وماعندناش خلفية نرجع ليها
ومحدش يفهمى غلط فى حته خلفية دى !!
 ومفيش خبرة اتعلمناها فى حياتنا ودا طبيعى لاننا فى اول الطريق
الشئ التانى هو اننا حماسنا غير منظم ولسه مش عارفين نشيل مسؤولية
استثنى من دا طبعاً اللى راحوا مننا شهداء للوطن ، على الاقل قدر يشيل مسؤولية روحة على كتفه
انما الباقى مافتكرش انه يقدر يعمل شئ على ارض الواقع .. على الاقل دلوقت .. الله اعلم بعدين ..